अन्नपूर्ण टप टेन : मतदाता नामावली अद्यावधिक सुरु, हेटौँडाका अवैध संरचनामा डोजर चलाइने

राष्ट्रपतिबाट पुनर्विचारका लागि १५ बुँदे सन्देशसहित फिर्ता भएको नागरिकता विधेयकलाई राष्ट्रियसभाले छलफलका लागि विधायन व्यवस्थापन समितिमा पठाएको छ । आजको  राष्ट्रियसभा बैठकमा गृहमन्त्री बालकृष्ण खाँणले विधायन व्यवस्थापन समितिमा पठाइयोस् भन्ने प्रस्ताव प्रस्तुत गर्नुभएको थियो । जसलाई सभाले सर्वसम्मतिले स्वीकृत गरेको छ । विधेयकमाथि अब राष्ट्रियसभाको विधायन व्यवस्थापन समितिमा दफावार छलफल हुनेछ । विषयगत समितिले अब विधेयक पारित गरेर समितिको प्रतिवेदन सहित पुनः सभामा पेश गर्नेछ । 
 
राष्ट्रपतिको भूमिका हिजो पनि ठीक थियो, आज पनि ठीक छ : भट्टराई

नेकपा एमालेका सचिव योगेश भट्टराईले राष्ट्रपति विद्यादेवी भण्डारीको भूमिका सही भएको बताउनुभएको छ । सामाजिक सञ्जालमार्फत् नेता भट्टराईले राष्ट्रपतिको भूमिका उपयुक्त रहेको दाबी गर्नुभएको हो । उहाँले विगतमा रामवरण यादव राष्ट्रपति हुँदा राष्ट्रपतिका अनौपचारिक भेटघाट र छलफलमा भाग लिएका वरिष्ठ व्यक्तिहरू नै अहिले राष्ट्रपतिको सक्रियता अनावश्यक भनेर टिप्पणी गरिरहेका आरोप लगाउनुभएको छ । 
 
एमालेले बनायो चुनाव परिचालन केन्द्रीय कमिटीको सचिवालय 

नेकपा एमालेले मंसिरमा हुने आमनिर्वाचनका लागि ४ सय ५१ सदस्यीय केन्द्रीय निर्वाचन परिचालन समिति गठन गरेको छ । अध्यक्ष केपी शर्मा ओलीको नेतृत्वमा गठन गरेको समितिमा केन्द्रीय कमिटीका सबै सदस्य, केन्द्रीय आयोगका पदाधिकारीहरू, विभागका सचिव, जनसंगठनको अध्यक्ष र महासचिव सदस्य रहेका छन् । 
 
त्रिविमा उपकुलपतिको पत्रकार सम्मेलन चलिरहँदा नेविसंघ र अनेरास्ववियुबीच झडप

त्रिभुवन विश्वविद्यालय परिसरमा नेविसंघ र अनेरास्ववियुका कार्यकर्ताबीच झडप भएको छ । त्रिविका उपकुलपति धर्मकान्त बाँस्कोटाले पत्रकार सम्मेलन गरिरहेका बेला स्मृति भवनबाहिर नेविसंघले विरोध प्रदर्शन गरेको थियो । विरोध प्रदर्शनका क्रममा विवाद हुँदा नेविसंघ र अनेरास्ववियुका कार्यकर्ताबीच झडप भएको हो । 
 
शिक्षामन्त्रीलाई नेविसंघको कडा ध्यानाकर्षण 

नेपाल विद्यार्थी संघले २९ बुँदे माग राखेर शिक्षा, विज्ञान तथा प्रविधिमन्त्री देवेन्द्र पौडेललाई ज्ञापनपत्र बुझाएको छ । नेविसंघ अध्यक्ष दुजाङ शेर्पाको नेतृत्वमा गएको टोलीले आज सिंहदरबारस्थित मन्त्रालयमा पुगेर पौडेललाई विद्यार्थीका समस्याबारे ध्यानाकर्षण गराउँदै ज्ञापन पत्र बुझाएको हो । 
 
काठमाडौं महानगरले भत्कायो भोटाहिटीको अण्डरपासमाथि बनाइएका अवैध संरचना 

काठमाडौं महानगरपालिकाले रत्नपार्कअगाडिको अण्डरपासमाथि बनाइएका अवैध संरचना भत्काएको छ । आज महानगर प्रहरीले भोटाहिटी र रत्नपार्क जोड्ने अण्डरपासमाथि बनाइएका अवैध संरचना भत्काएको हो । सब वेभित्रका सातवटा बाहेक सबै सटर अवैध भएको पाइएकाले ती सबै संरचना हटाउन थालिएको महानगर प्रहरी प्रमुख राजु पाण्डे जानकारी दिनुभयो । 
 
हेटौँडाका अवैध संरचनामा डोजर चलाइने

हेटौँडा उपमहानगरपालिकामा पनि अवैध संरचनामा डोजर चलाइने भएको छ । उपमहानगरले कानुन विपरीत बनेका संरचना हटाउने तयारी गरेको हो । नक्सा पास नगरी बनाइएका संरचना र पार्किङका लागि पास भएका स्थानमा सञ्चालित व्यवसाय हटाउन उपमहानगरले ३५ दिने सूचना जारी गर्ने तयारी गरेको छ । हेटौँडाकी मेयर मिनाकुमारी लामाले ३५ दिने सूचना जारी गर्न निर्देशन दिनुभएको छ । 
 
नेपालको विद्युत् उत्पादन क्षमता २,२६९ मेगावाट

ऊर्जा, जलस्रोत तथा सिंचाइमन्त्री पम्फा भुसालले मन्त्रालय सम्हालेदेखिको आफ्नो उपलब्धि सार्वजनिक गर्नुभएको छ । मन्त्री भुसालले आफ्नो उपलब्धि सार्वजनिक गर्दै गत आर्थिक वर्षमा मन्त्रालयको वित्तीय र भौतिक प्रगित क्रमशः ७६.६६ र ८० प्रतिशत हासिल गरेको जानकारी दिनुभयो । गत आवमा विद्युत् उत्पादन क्षमता ७४१ मेगावाट थप भई कुल विद्युत् उत्पादन क्षमता २२६९ मेगावाट पुगेको उहाँको भनाई छ । 
 
मतदाता नामावली अद्यावधिक सुरु 

निर्वाचन आयोगले आजदेखि मतदाता नामावली अद्यावधिक गर्ने भएको छ । आगामी मंसिर ४ का लागि तय प्रतिनिधि र प्रदेश सभा निर्वाचन कार्यक्रम अन्तरगत आयोगले आजदेखि नामावली अद्यावधिक गर्न लागेको हो । यसैबीच समानुपातिक निर्वाचन प्रणालीतर्फ दल मनोनयनको आज अन्तिम दिन रहेको छ । 
 
एक महिला मृत फेला

काठमाडौंको शङ्खरापुर नगरपालिकामा एक महिला मृत फेला परेकी छन् । शंङ्खरापुर नगरपालिका वडा नम्बर–१ स्थित नाङ्लेभारे बजारस्थित गोरेटो बाटोमा सोही ठाउँ बस्ने ४६ वर्षीया बिमला तामाङ (मगर) मृत फेला परेकी हुन् । उनको शव आज बिहान भेटिएको प्रहरीले जनाएको छ । महिलाको मृत्यु प्रकरणमा प्रहरीले थप अनुसन्धान गरिरहेको जनाएको छ ।