माओवादीले स्थानीय चुनावमा भएको अन्तर्घातको छानबिन गर्ने
नेकपा माओवादी केन्द्रले वैशाख ३० गते भएको स्थानीय तह निर्वाचनमा भएको अन्तर्घातको छानबिन गर्ने भएको छ । पार्टीको आजको केन्द्रीय समिति बैठकमा अध्यक्ष पुष्पकमल दाहाल प्रचण्डले अनुशासन आयोगका अध्यक्ष टंक राईको नेतृत्वमा छानबिन समिति बनाउने प्रस्ताव राख्नुभएको हो ।
यो समितिले १५ दिनभित्र स्थायी समितिलाई प्रतिवेदन बुझाउने र त्यसका आधारमा कारबाही गर्ने उहाँले जानकारि दिनुभयो । यस्त,ै पार्टीले विशेष महाधिवेशन पनि गर्ने भएको छ । अध्यक्ष प्रचण्डले छिट्टै नै विशेष महाधिवेशन मिति तोकिने पनि जानकारि दिनुभयो ।
सो महाधिवेशनबाट समाजवादी क्रान्तिको योजनालाई नयाँ उचाइमा पुर्याउन नयाँ अभियान चलाउने अध्यक्ष प्रचण्डको भनाइ छ ।
यस्तै प्रचण्डले आफ्नो पार्टीबाट सरकारमा प्रतिनिधित्व गर्ने मन्त्रीहरूलाई एक हप्ताभित्र आफ्नो मन्त्रालयको प्रगति विवरण बुझाउन निर्देशन दिनुभएको छ । धेरै नकारात्मक कुराहरू मात्रै बढी प्रचार भएकाले अब आफ्नो पार्टीका मन्त्रीहरूले हासिल गरेका उपलब्धिलाई जनतामा लैजानुपर्नेमा उहाँले जोड दिनुभयो ।
प्रचण्डले माओवादीले सम्हालेका अर्थ र ऊर्जा मन्त्रालयले धेरै राम्रा कामहरु गरेको पनि दावी गर्नुभयो ।
