काठमाडौं। संसदको शिक्षा तथा स्वास्थ्य समितिले कक्षा १२ को परीक्षा भौतिक उपस्थितिमा गराउन सरकारलाई निर्देशन दिएको छ।
मंगलबार बसेको समितिको बैठकले जनस्वास्थ्यका मापदण्ड पालना गरी भौतिक उपस्थितिमा तत्काल परीक्षा गराउन निर्देशन दिएको हो। समिति सभापति जयपुरी घर्तीले अन्य परीक्षाहरु सन्चालन भइरहेको भन्दै कक्षा १२ को परीक्षा पनि तत्काल गराउन निर्देशन दिएकि हुन्।
बैठकमा उपस्थित समितिका सदस्यहरुले स्वास्थ्य मन्त्रालय र शिक्षा मन्त्रालयबीचको समन्वयमा तत्काल परीक्षा गराउनुपर्नेमा जोड दिएका छन्। कोरोना संक्रमण जोखिमका कारण साउन ३१ देखि हुन लागेको कक्षा १२ को परीक्षा स्थगित भएको थियो।
