विराटनगर, १० पौष । विराटनगर ७ महाविर रोडमा गएराति भएको विष्फोटमा परेर दुई जना घाइते भएका छन् । विष्फोटमा परेर विराटनगर ७ का ४३ वर्षीय भगतलाल केसरी र २७ वर्षीय श्याम साह घाइते भएका छन् । दाहिने खुट्टाको औंलामा चोट लागेका घाइते केसरीको गोल्डेन अस्पताल विराटनगरमा उपचार भइरहेको छ । साह कोसी अञ्चल अस्पताल विराटनगरमा उपचार गराएर घर फर्किएका छन् । आन्दोलनरत संयुक्त लोकतान्त्रिक मधेसी मोर्चाले प्रहरीमाथि ढुँगा मुढा गरिरहेका बेला विष्फोट भएको वडा प्रहरी कार्यालय विराटनगरका प्रहरी निरीक्षक किशोर लम्सालले बताउनु भयो ।
उहाँका अनुसार विष्फोट भएको बस्तुको पहिचान हुन सकिरहेको छैन । प्रहरीले आन्दोलनकारीले विष्फोटका लागि तयार पारेको वम विष्फोट भएको हुन सक्ने आशंका गरेको छ । कहाँबाट कसरी विष्फोट भयो भन्ने कुरा पत्ता नलागेका कारण घटनाको अनुसन्धान थालिएको प्रहरीले जनाएको छ ।
