काठमाडौं,७ पौष । पूर्वप्रधानमन्त्री तथा एमालेका नेता माधबकुमार नेपालले राष्ट्रपति विद्या भण्डारीले पूजा गरेपछि जानकी मन्दिरमा मधेसी मोर्चाका कार्यकर्ताले गरेको व्यवहारले संसारकै महिलामाथि अपमान भएको बताउनु भएको छ । राष्ट्रपति भण्डारीमाथि गरेको अपमान संसारका महिलाजाति माथि गरिएको अपमान भएकाले सबैले भत्र्सना गर्नुपर्ने उहाँको भनाइ थियो ।
प्रेस चौतारी नेपालकोे पाँचौं बैठकको आज राजधानीमा उदघाटन गर्दै नेता नेपालले मधेशी मोर्चाका कार्यकर्ताको व्यवहारले मोर्चाले कस्तो समाज बनाउन खोजेको भन्ने कुरा स्पष्ट भएको बताउनु भएको हो । उहाँले भन्नुभयो–‘मधेशी मोर्चाका कार्यकर्ताले विधवा प्रवेश गरेको भनेर मन्दिर सफाइ गरेपछि मोर्चाले कस्तो समाज बनाउन खोजिरहेको भन्ने देखाएको छ ।’ जानकी मन्दिर घटनाबारे मधेसी मोर्चा औपचारिक रुपमा नबोल्नु खेदजनक भएको पनि नेपालले बताउनु भयो ।
राष्ट्रपति भण्डारीमाथि गरिएको व्यवहार सुनेर आफूलाई साहै दुःखी तुल्याएको भन्दै उहाँले संसार भरिका नारीमाथि ठेस लाग्ने गरी भएको व्यवहारको आम नागरिक, र मानवअधिकार्मीहरुले खुलेर आपत्ति गर्नुपर्ने उल्लेख गर्नुभयो । नेता नेपालले राजनीतिक निकाशका लागि प्रदेश संख्या बढाउनेगरी संघीयतामा सहमति गर्न नसकिने पनि बताउनु भयो ।
