काठमाडौं,१ पौष । टेलिभिजन प्रशारक संस्था डिसहोमको ललितपुर भैंसेपाटीस्थित कन्ट्रोल युनिटमा अज्ञात समूहले आज बिहान आगजनी गरेको छ । बिहान ६ बजेतिर ३ वटा मोटरसाइकलमा आएको समुहले डिसहोमको कार्यालयका कर्मचारीलाई नियन्त्रणमा लिएर कन्ट्रोल युनिटमा पेट्रोल छर्केर आगजनी गरेको ललितपुर प्रहरीका डिएसपी दयानिधि ज्ञवालीले जानकारी दिनुभयो । उहाँका अनुसार, आगजनी गराउनेहरु चढेको बा ६१ प ६४४२ नम्वरको मोटरसाइकलको मात्र पहिचान खुलेको छ ।
घटना कसले गराएको भन्ने खुलिनसकेको र यसबारे अनुसन्धान भइरहेको प्रहरीले जनाएको छ । भारतीय च्यानलहरुको प्रशारण बन्द नगरेको विरोधमा नेत्रविक्रम चन्द नेतृत्वको माओवादीले डिसहोमलाई यसअघि आक्रमणको चेतावनी दिएकाले उसले आगजनी गरेको हुन सक्ने आशंका गरिएको छ । यसको पुष्टि हुन भने बाँकी छ । आगजनीबाट ५० लाख रुपैया बरावरको क्षति भएको डिसहोमले जनाएको छ ।
