सिरहा,२५ मंसिर । ट्याक्टरले किचेर सिरहाको गोलबजारमा आज बिहान एकजना आन्दोलनकारीको मृत्यु भएको छ । गोलबजार नपा ४ का कुशे साहको स.१ त १८४५ नम्बरको ट्याक्टरले किच्दा उनको ज्यान गएको प्रहरीले जनाएको छ । गोलबजारबाटै सिमेन्ट लिएर दक्षिणतर्फ गइरहेको ट्याक्टर रोक्ने प्रयास गरेका उनलाई ट्याक्टरले किचेको बताइएको छ । सिमेन्ट लोडगरिरहेकै अवस्थामा साहले बन्दमा किन गाडी चलाएको भन्दै रोक्ने प्रयास गरेपनि ट्याक्टरले सिमेन्ट लिएर जानेक्रममा रोक्ने प्रयास गरेको स्थानीयले बताएको छ ।
रोक्ने प्रयासको क्रममा साहले ट्याक्टरमा ग्यास सिलिण्डर प्रहार गर्दा साह लडेर ट्याक्टर अगाडी पुगेको जनाइएको छ । ट्याक्टरले किचेर घाइते भएको साहको उपचार गर्न लहानतर्फ लाँदै गरेको अवस्थामा बाटोमै मृत्यु भएको इलाका प्रहरी कार्यालय गोलबजारका प्रमुख प्रहरी इन्सपेक्टर सन्तोष निरौलाले जानकारी दिए । ट्याक्टर रोक्ने क्रममा भने साह एक्लै रहेको बताइएको छ । यता आन्दोलनकारीले भने आफ्नो कार्यकर्ताको हत्या गरेको भन्दै गोलबजारमा टायरवालेर नारावाजी गरेका छन् ।बन्द हडतालका कारण दिनभरी बजार पसलहरु बन्द रहने हुँदा रातको समयमा निर्माण सामग्रीहरु विक्री हुने गरेको छ ।
