काठमाडौं,२४ मंसिर । आज मंसिर कृष्ण चतुर्दशी अर्थात बालाचर्तुदशी । हिन्दु धर्माबलम्बीहरुले सतबीज छरेर बालाचतुर्दशी पर्व मनाउँंदैछन् । नेपालमा मनाइने विभिन्न धार्मिक संस्कृतिमध्येको बालाचर्तुदशीलाई सनातन हिन्दू धर्म अन्तर्गत विशिष्ट महत्व सहित मान्ने प्रचलन रहेको छ ।
बालाचतुर्दशी पर्वका अवसरमा आज सतबीज रोपण गरी पितृ उद्धारको कामना गर्ने प्रचलन रहेको छ । शतबीजरोपणले पितृको उद्धार हुन्छ भन्ने जनविश्वास छ । शतबीजअन्तर्गत आज धान, जौ, गहुँ, चना, तिल, कागुनु र मकैलाई मिसाएर छर्ने गरिन्छ ।
आज सतबिज छर्न देशभरका शिवलिङगहरुमा भक्तजनहरुको घुँईचो लागेको छ । झापाको अर्जुनधारा धाम, सुनसरीको बराहा क्षेत्र , सूर्यघाट, गौरीघाट, राजधानीको गुह्येश्वरी, पशुपति, मृगस्थली लगायत स्थानमा शतबीज छर्ने सर्बसाधारणहरुको बिहानैदेखि विशेष भीड लागेको छ ।
