काठमाडौं,२ मंसिर । नेपालमा अनाथ बालबालिका र समस्यामा परेका महिलाहरुको सेवामा झण्डै एक दशकयता सक्रिय अमेरिकी युवती म्यागी डोयन यस बर्षको सीएनएन हिरो घोषित भएकी छन् । उत्कृष्ट १० प्रतिष्पर्धीमाझ अनलाइन भोटिङ्गमा सर्वाधिक मत प्राप्त गरेकी म्यागीलाई न्यूयोर्कमा आयोजित समारोहमा बिजेता घोषणा गरिएको हो ।
सीएनएन हिरो अफ द इयर उपाधिका लागि उनले १ लाख अमेरिकी डलर र उत्कृष्ट १० जनामा परेकोमा छुट्टै १० हजार डलर पुरस्कार जितेकी छन् । म्यागीले सुर्खेतमा कोपिला भ्याली नाममा बालगृह, विद्यालय र महिला केन्द्र संचालन गर्दै आएकी छन् ।
अमेरिकाको न्यू–जर्सी घर भएकी उनले सन् २००६ मा नेपाल भ्रमणमा आउँदा सुर्खेतमा सशस्त्र द्धन्द्धबाट प्रभावित बालवालिकाको दुरावस्था देखेपछि स्थानियसंगको सहकार्यमा संस्था स्थापना गरी बालगृह शुरु गरेकी थिइन् । पछि ती बालबालिकाका लागि विद्यालय र महिलाहरुका लागि छुट्टै केन्द्र सञ्चालनमा ल्याएकी थिइन् ।नेपालबाट यसअघि अनुराधा कोइराला र पुष्पा बस्नेत सीएनएन हिरो घोषित भइसकेका छन् ।
