काठमाडौं,२४ कार्तिक । निजी क्षेत्रका आन्तरिक वायुसेवा सञ्चालकहरुले आजदेखि हवाई भाडा बढाएका छन् । नेपाल आयल निगमले आन्तरिक उडानतर्फ हवाइ इन्धनको मूल्य झण्डै दोब्बरले बढाएपछि वायुसेवा कम्पनीहरुले पनि करीब ३० प्रतिशतले भाडादर बढाएका हुन् । यो भाडादार हवाई इन्धन आपूर्ति सहज नभएसम्मका लागि मात्रै कायम गरिएको हो ।
निगमले हवाई इन्धनको मूल्य प्रतिलिटर २ सय ३२ रुपैयाँ ७८ पैसा कायम गरेको छ । यसअघि आन्तरिक उडानतर्फ हवाइ इन्धनको मूल्य प्रतिलिटर १ सय १८ रूपैयाँ थियो । भारतको अघोषित नाकाबन्दीका कारण एयर लिफ्ट गरेर हवाइ इन्धन ल्याउनु परेको भन्दै आयल निगमले हिजो हवाई इन्धनको मूल्य बढाएको हो ।
