रौतहट,२४ कार्तिक । रौतहटको चन्द्रनिगाहपुरमा आज बिहान मिनि ट्रक र मोटरसाइकल जुध्दा मोटरसाइकलमा सवार ४ जनाको मृत्यु भएको छ । एउटै मोटरसाइकलमा सवार चार जनाको मृत्यु भएको प्रहरीले जनाएको छ । रौतहटको औरहीयाका २३ वर्षीय विवेक सिंह, २६ वर्षीय कामोद साह, जयप्रकाश गुप्ता र सखुअवा धमौराका २६ वर्षीय रुपेशकुमार यादवको मृत्यु भएको हो ।
यादव, साह र सिंहको घटनास्थलमै तथा गुप्ताको उपचारका लागि चन्द्रनिगाहपुर अस्पताल लैजाने क्रममा बाटोमा मृत्यु भएको इलाका प्रहरी कार्यालय चन्द्रनिगाहपुरका प्रहरी नायव उपरीक्षक मनोज यादवले जानकारी दिनुभयो । चन्द्रनिगाहपुरट गौर जाँदै गरेकोे बा ३३ प २०६८ नम्बरको मोटरसाइकल र गरुडाबाट चन्द्रनिगाहपुर जादै गरेको ना ५ ख ९७९१ नम्बरको मिनी ट्रक चन्द्रनिगाहपुर नगरपालिका–५ बालचनपुर चोकमा बिहान करिव पाँच बजे एकापसमा ठोक्किएका हुन् । मिनी–ट्रकलाई प्रहरीले नियन्त्रणमा लिएको छ भने चालक फरार छन् ।
