​तिहार सुरु, आज काग तिहार

काठमाडौंं,२३ कार्तिक । नेपाली हिन्दूहरुको दोस्रो ठूलो धार्मिक तथा सांस्कृतिक पर्व तिहार आजदेखि सुरु भएको छ । पाँच दिनसम्म मनाइने भएकाले यो चाँडलाई यमपञ्चक पनि भन्ने गरिन्छ । यस पर्व अन्तर्गतको पहिलो दिन आज कागतिहार मनाइन्दैछ ।

धार्मिक मान्यताअनुसार यमराजको सन्देश वाहकको रुपमा मानिएको कागलाई आज यमदूतकै रुपमा लिई पूजा गरेर खानेकुरा दिई सत्कार गर्ने गरिन्छ । तिहार पर्वलाई वैदिक कालमा भगवान विष्णुले खुसी भई बलि राजालाई कार्तिक कृष्ण पक्षका अन्तिम ५ दिन तीनै लोकको राज्य भोग गर्न पाउने वरदान दिएको र यी ५ दिन बलि राजाले आफ्नो राज्यभरी दीपावली गरी झकिझकाउ पारेको कथासँग जोडिएको छ ।

यसो गरेमा धनकी देवी महालक्ष्मी खुसी भई सबैको घरघरमा बास गरी धनधान्यले भरिपूर्ण पारिदिन्छिन् साथै यमराज पनि खुसी हुन्छन् भन्ने धार्मिक बिश्वास रहेको छ ।