गौशाला, १७ असोज । महोत्तरीको गौशाला नगरपालिका–७ मा बारीमा गाडेर राखिएको अवस्थामा आज बिहान प्रहरीले ठूलो परिमाणमा काठ बरामद गरेको छ । इलाका प्रहरी कार्यालय गौशालाबाट प्रहरी निरीक्षक चन्देश्वर यादवको नेतृत्वमा खटिएको टोलीले गौशाला नगरपालिका–७ का राजाराम महतोको बारीमा गाडिएको अवस्थामा एक ट्र्याक्टर काठ बरामद गरेको प्रहरी निरीक्षक यादवले बताउनुभयो ।
तराई मधेसमा लामो समयदेखि चलिरहेको बन्द, हडतालको मौका छोपी महतोले नजिकैको सागरनाथ वनबाट चोरी तस्करी गरी ल्याएको कर्मा, खयर र साखुको करिब एक सय क्युबिक फिट काठ गोप्य सूचनाको आधारमा प्रहरीले महतोको बारीबाट बरामद गरेको हो ।
तेह्र (१३) वटा ठूल्ठूला गोलिया बनाएर गाडिएको ती काठलाई इलाका प्रहरी कार्यालय गौशालामा राखिएको छ भने आवश्यक कारबाहीका लागि सागरनाथ वन विकास परियोजनालाई बुझाउने तयारी भइरहेको प्रहरी निरीक्षक यादवले बताउनुभयो । महतो फरार रहेको इलाका प्रहरी कार्यालयले जनाएको छ । रासस
