फलेवास (पर्वत), ५ असोज । उत्तरी पर्वतको लेखफाँट गाविसमा भिरबाट लडेर आज बिहान एक व्यक्तिको ज्यान गएको छ । लेखफाँट गाविस–६ गैरीगाउँ निवासी ३६ वर्षीय शेरबहादुर जिसीको मृत्यु भएको हो । घर नजिकै रहेको भिरबाट अन्दाजी १०÷१५ मिटर तल खोल्सामा खस्दा जिसीको मृत्यु भएको जिल्ला प्रहरी कार्यालय पर्वतले जनाएको छ । घटनाको अनुसन्धानका लागि जिल्ला प्रहरी कार्यालयबाट प्रहरीको टोली उक्त स्थानतर्फ गएको प्रहरीले जनाएको छ । बिहान गोरेटो बाटोमा हिँड्दै गर्दा उनी खोल्सामा खसेको प्रहरीले जनाएको छ । रासस
