जनकपुरधाम,२८ भदौ । पर्साको वीरगन्जमा पत्रकार राम सर्राफको घरमा अज्ञात समुहले पेट्रोल बम प्रहार गरेको छ । राष्ट्रिय फोटो पत्रकार समुहका केन्द्रिय उपाध्यक्ष सर्राफको विरगञ्ज १२ स्थित घरमा गएराती सवा नौ बजे तिर अज्ञात समुहले पेट्रोल बम प्रहार गरेको हो ।
कर्फ्यु लागेकै बेला राति सवा नौ बजे तिर मोटरसाइकलमा आएका अपरिचित युवकहरुले सर्राफको घरको मुल गेटमा पेट्रोल बम प्रहार गरेर फरार भएको प्रत्यक्षदर्शीले बताएका छन् । आफु सपरिवार घरभित्र रहेका बेला मुल गेट बाहिर आगो बलेको देखेर छिमेकीहरुले खबर गरेपछि बाहिर आएर हेर्दा बलिरहेको आगोबाट पेट्रोलको गन्ध आएको सर्राफले बताए । घटना लगत्तै पर्साका प्रमुख जिल्ला अधिकारी केशवराज घिमिरेलाइ जानकारी गराएपनि कुनै सहयोग नपाएको उहाँंको गुनसो छ ।
