मनिकाझा
जनकपुरधाम,२५ भदौ । महोत्तरी सदरमुकाम जलेश्वरमा प्रर्दशनकारीहरुको प्रहारबाट एक प्रहरी असई गम्भीर घाइते भएका छन् । स्थानियशंकर चौकमा सादा पोसाकमा रहेका असई थमनबहादुर विकलाई कर्फ्यु खुकुलो बनाइएको मौका छोपी प्रर्दशनकारीहरुले समातेर निर्घात कुटपिट गर्दा उनी गम्भीर घाइते भएका छन् । विकको टाउकोमा गहिरो चोट लागेको जनाइएको छ । जनाईएको छ । उनलाई उपचारको लागि जिल्ला अस्पताल जलेश्वरमा भर्ना गराइए पनि उपचार सम्भव नभएपछि थप उपचारकका लागि जनकपुर अंचल अस्पताल एम्बुलेन्समा राखेर पठाउने प्रयास गरिएको छ ।
तर, प्रर्दशनकारीहरुले एम्बुलेन्समा घाइते प्रहरी रहेको थाहा पाएपछि गाडीमाथि ढुंगामुढा गर्दै घाइते प्रहरीलाई मार्ने प्रयास गरेको महोत्तरीका प्रहरी उपरिक्षक सौरभ राणाले जानकारी गराए । एम्बुलेन्स चालकले तीव्र गतिमा गाडी भगाएपछि प्रर्दशनकारीहरु मोटरसाईकलमा सवारभई एम्बुलेन्सको पछि लागेको र अहिले एम्बुलेन्स कहाँ छ भनेर जानकारी आउन नसकेको उपरिक्षक राणाले बताएका छन् । जलेश्वरबाट जनकपुर आउने बाटोमा प्रहरीको भ्यानहरु पनि पठाइएको र घाइते प्रहरीको अवस्था बुझ्ने प्रयास गरिराखेको राणाले बताए ।
जलेश्वरमा बिहान केही बेर कर्फ्यु खुकुलो बनाइए पनि प्रहरीलाई प्रर्दशनकारीले कुटपिट गरि घाइते बनाउँंदा पुनःकर्फ्यु लगाइएको छ । यता प्रर्दशनकारीहरुले कफर््यु तोड्ने प्रयास गर्दा ठाउँ ठाउँमा झडप भएको छ ।
