काठमाडौं,९ भदौ । मलेसियाको क्वालाम्पुरमा शुक्रबाट सुरु हुने एसीसी अण्डर नाइन्टीन प्रिमियरमा सहभागी हुने अण्डर नाइन्टिन राष्ट्रिय क्रिकेट टोली आज मलेसिया प्रस्थान गर्दैछ । राजु रिजालको कप्तानीमा रहेको १४ सदस्यीय टोलीले उपाधिका लागि ४५ दिनको तयारी पछि मलेशिया प्रस्थान गर्न लागेको हो ।
प्रतियोगितामा नेपाल सहित अफगानिस्तान, युएइ, मलेसिया, साउदी अरेबिया र कुबेत रहेका छन । राष्ट्रिय टिमको आधार रहेको उमेर समुहको टोलीमा पनि परम्परागत ब्याटिङ समस्या भने उस्तै रहेको प्रशिक्षक जगत टमाटाले बताए । कप्तान राजुले मैदानमा कडा मेहनत गरेर सबैको अपेक्षा पूरा गर्ने सक्दो प्रयास गर्ने बताएका छन् ।
नेपाली टोलीमा आरिफ शेख,दिपेश श्रेष्ठ, सौरभ खनाल, प्रेम तामाङ, सुसिल कंडेल, दिपेन्द्र ऐरी, सुनिल धमला, शंकर लामा, योगेन्द्र सिंह कार्की, सन्दीप सुनार, रविराज सिंह, ललित नारायण राजबंशी र आषिश धामी रहेका छन । नेपालले आफ्नो पहिलो खेल आगामी शुक्रबार युएइ संग खेल्नेछ । त्यस्तै शनिबार अफगानिस्तान, सोमबार आयोजक मलेसिया, मंगलबार कुबेत र बिहीबार साउदी अरेबिया संग प्रतिस्पर्धा गर्नेछ । राउण्ड रोबिनका आधारमा खेलाइने प्रतियोगिताको शीर्ष स्थानमा रहने टोलीलाई बिजेता घोषणा गरिनेछ ।
