क्रान्ती साह
वीरगन्ज, २९ साउन । पर्साको सोनवर्षा गाविस नजिक पर्ने चरभैयामा रहेको नेपाली सेनाको पोष्टले ठूलो परिमाणको गाजा सहित तीन जनालाई पक्राउ गरेको छ । पर्सा वन्यजन्तु आरक्षको सुरक्षार्थ खटिएको सेनाले चार क्वीन्टल ५५ केजी गाजासहित तीनजनालाई पक्रेको हो ।
गाजासहित पक्राउ पर्नेहरुमा मकवानपुरको काकडा २ बस्ने ४५ वर्षीय चन्द्रबहादुर लोप्चन, ४६ वर्षीय गुण बहादुर तितुङ र मनहरी २ का ३० वर्र्षीय पूर्णबहादुर भ्लोन छन् । विशेष सुराकीको आधारमा खटिएको सेनाको टोलीले आरक्षको जंगलमा रहेको शीतलपुर खोला नजिकबाट गएराति ९ बजे तिर २१ वटा पोकामा रहेको गाजासहित तीनजनालाई पक्रेको हो ।
तस्करहरुले भरियामार्फत मकवानपुरको मनहरीबाट गाजा लिएर आरक्षको जंगलको बाटोहँुदै पर्साको सोनवर्षातर्फ आउँंदै गरेको अवस्थामा सेनाको टोलीले उनीहरुलाई पक्रेको हो ।
