असार १६, काठमाडौं ।
कोपा अमेरिका कप फुटबलको उपाधिका लागि आयोजक चिली र अर्जेन्टिनाबीच प्रतिस्पर्धा हुने भएको छ । आज बिहान भएको दोश्रो सेमिफाईनलमा पाराग्बे माथि ६–१ को फराकिलो जित निकाल्दै अर्जेन्टिनाले आयोजकसंगको भेट पक्का गरेको हो । एकपक्षिय खेलमा अर्जेन्टिनाले १५ औ मिनेटमा मार्कोस रोजोको गोलबाट अग्रता लिएको थियो । त्यस्तै जेभियर पास्तोरले २७ औ मिनेटमा गोल थप्दै खेललाई २–० को स्थितिमा पु¥याएका थिए । पहिलो हाफको अन्तिम समयमा लुकास बारियोसले १ गोल फर्काएपनि पाराग्बेले अन्य मौकाको सदुपयोग गर्न नसक्दा फराकिलो हार ब्योर्होन बाध्य भयो ।
दोश्रो हाफमा आक्रामक खेल पस्केको अर्जेन्टिनाका लागि एङगेल डि मारियाले दोश्रो हाफको सुरुबाती १० मिनेटमा २ गोल गरेका थिए । त्यस्तै सर्जियो अगुईरो र गोन्जालो हिगुईनले खेलको अन्तिम समय १–१ गोल गर्दै टोलीको अन्तर फराकिलो पारेका थिए ।
उपाधि भिडन्त आगामी शनिबार हुनेछ ।
