काठमाडौं, ४ असार ।
अरनीको राजमार्ग अन्तर्गत सिन्धुपाल्चोकको जुरेमा फेरि पहिरो खसेको छ । गत बर्षको साउनमा भीषण पहिरोले १ सय ४५ जनाको ज्यान लिएकोे जुरेमा आज बिहान फेरि पहिरो खसेपछि यातायात अवरुद्ध भएको छ । पहिरो झर्ने क्रम नरोकिएपछि बाटो खुलाउन समस्या भएको इलाका प्रहरी कार्यालय बाह्रविसेका प्रहरी निरिक्षक मञ्जिल मुकारुङले जानकारी दिनुभयो । अवरुद्ध सडक खोल्न स्काभेटर, प्रहरी तथा स्थानियबासीले प्रयास गरिरहेका छन् ।
त्यस्तै पोखरा–बाग्लुङ सडकखण्डअन्तर्गत पर्वतको तिलङटा–६ मौरीभिरमा पहिरो झर्दा यातायात सञ्चालन हुन सकेको छैन । पहिरो पन्छ्याएर यातायात सञ्चालनमा ल्याउने प्रयास भईरहेको प्रहरीले जनाएको छ ।
यसैगरी पुष्पलाल राजमार्ग अन्तरगत दोलखाको बोच १ चर्नावतीमा ठूलो ढुङ्गा खस्दा अवरुद्ध सडक खण्ड भने सञ्चालनमा आएको छ । भारी बर्षाका कारण बाटैमा ढुङ्गा खसेपछि सवारी साधन सञ्चालन हुन सकेको थिएन ।
