असार ४, एजेन्सी ।
ईण्डिया बिरुद्धको पहिलो वन डे क्रिकेटमा बंगलादेश ७९ रनले विजयी भएको छ । योसँगै बंगलादेशले ३ म्याचको सिरिजमा १–० को अग्रता लिएको छ ।
अन्तराष्ट्रिय वन डे मा डेब्यु गरेका मुस्ताफिजुर रहमानले ५ विकेट लिएपछि ३ सय ८ रनको लक्ष्य पछ्याएको ईण्डिया ४६ ओभरमा २ सय २८ रनमा समेटियो । रोहित शर्माले ६३ र सुरेश रैनाले ४० रनको योगदान गरेपनि अन्य ब्याट्सम्यान चल्न नसक्दा ईण्डिया सस्तैमा समेटियो । ९ ओभर २ वल बलिङ्ग गरेका रहेमानले एक मेडन सहित ५० रन खर्चिएर ५ विकेट लिए । यस्तै सकिब अल हसन र तस्किन अहमदले समान २ विकेट लिए ।
यसअघि मीरपुरमा टस जितेर पहिले ब्याटिङ्ग गरेको घरेलु टोली बंगलादेशले ४९ ओभर ४ वलमा अलआउट हुँदै ३ सय ७ रनको योगफल तयार पारेको थियो । तमिम ईकवालले ६०, सोम्य सरकारले ५४ र सकिब अल हसनले ५२ रन जोडेपछि बंगलादेश सम्मानजनक योगफल बनाउन सफल भयो । रबिचन्द्रन अश्विनले ३ तथा भुवनेश्वर कुमार र उमेश यादवले समान २ विकेट लिए ।
दोस्रो वन डे आगामी आईतवार ढाकामा हुनेछ ।
