जेठ ३, एजेन्सी ।
न्युजिल्याण्ड बिरुद्धको चौथो वन डे क्रिकेटमा ईङ्ल्याण्ड ७ विकेटले विजयी भएको छ । योसँगै ५ म्याचको सिरिज २–२ को बराबरीमा आएको छ । ईयान मोर्गान र जोए रुटले बिष्फोटक ब्याटिङ्ग गर्दै सतक बनाएपछि ३ सय ५० रनको उच्च लक्ष्य ईङ्ल्याण्डले ४४ ओभरमा ३ विकेट गुमाएर भेट्टाएको थियो । यो ईङ्ल्याण्डले भेट्टाएको अहिलेसम्मकै सर्वाधिक लक्ष्य पनि हो । कप्तान मोर्गानले ८३ वलमा १ सय १३ रन जोडे भने रुट १ सय ६ रनमा नटआउट रहे । यस्तै एलेक्स हेल्सले ३८ वलमा ६७ रनको बिष्फोटक पारी खेलेका थिए ।
यसअघि नोटिङ्गघममा टस जितेर ब्याटिङ्ग गरेको पाहुना टोली न्युजिल्याण्डले निर्धारित ओभरमा ७ विकेट गुमाई ३ सय ४९ रनको योगफल तयार पारेको थियो । कान विलिएम्सनले ९०, ग्राण्ट एलिएटले नटआउट ५५ र मार्टिन गुप्टिलले ५३ रन जोडेका थिए । पाँचौ तथा निर्णायक वन डे आगामी शनिवार हुनेछ ।
