जेठ ३२, एजेन्सी ।
वेष्टईण्डिज बिरुद्धको दुई म्याचको टेष्ट सिरिज अष्ट्रेलियाले क्लिनस्विप गरेको छ । दोस्रो म्याचमा २ सय ७७ रनको फराकिलो जित निकाल्दै अष्ट्रेलियाले सिरिज क्लिनस्विप गरेको हो । ३ सय ९२ रनको लक्ष्य पछ्याएको क्यारेबियन टोली १ सय १४ रनमै समेटियो ।
चार जना ब्याट्सम्यान डक आउट भएको क्यारेबियन ईनिङ्गस्मा कप्तान दिनेश रामदिनले सर्वाधिक २९ रन जोडे । अष्ट्रेलियन बलरले २७ रन अतिरिक्त दिएको थियो । उसलाई सस्तैमा समेट्न मिचेल मार्सले ३ तथा जोस हाजलउड, नाथन लियोन र मिचेल जोन्सनले समान २ विकेट लिए ।
जमैकामा टस हारेर ब्याटिङ्ग गरेको पाहुना टोली अष्ट्रेलियाले पहिलो ईनिङ्गस्मा ३ सय ९९ रन जोडेको थियो भने दोस्रो ईनिङ्गस् २ विकेटको क्षतिमा २ सय १२ रनमा डिक्लियर गरेको थियो । वेष्टईण्डिज पहिलो ईनिङ्गस्मा २ सय २० रनमा समेटिएको थियो ।
