जेठ २०, एजेन्सी ।
दोस्रो वरियाताका रोजर फेडेरर, फ्रेन्च ओपन टेनिसको क्वाटरफाईनलबाटै बाहिरिएका छन् । गएराती भएको खेलमा आफ्नै देशका स्टेनिसलस वावरिन्कासँग पराजित हुदै स्विस फेडेरर प्रतियोगिताबाट बाहिरिएका हुन् । पहिलो सेट ६–४ ले आफ्नो पक्षमा पारेका वाव रिन्काले बाँकी सेटमा समेत फेडेररलाई फर्कने अवसर दिएनन् । बाँकी सेट ६–३ र ७–६ ले आफ्नो पक्षमा पार्दै आठौं बरियाताका वावरिन्काले अन्तिम ४ मा स्थान बनाए ।
यस्तै अर्को खेलमा जापानका केई निसिकोरीलाई पराजित गर्दै फ्रान्सका जो वेलफ्रेड सोङ्गा पनि सेमिफाईनलमा प्रवेश गरेका छन् । पाँचौ बरियाताका निसिकोरीमाथि ६–१, ६–४, ४–६, ३–६ र ६–३ को संघर्षपूर्ण जित निकाल्दै १४ औं वरियाताका सोङ्गा पनि अन्तिम ४ मा प्रवेश गरेका हुन् ।
यस्तै महिला एकल तर्फ सर्बियाकी अन्ना ईभानोभिच र चेकरिपब्लिककी लुसी साफारोभा पनि सेमिफाईनलमा प्रवेश गरेका छन् । सातौं बरियाताकी ईभानोभिचले युक्रेनकी एलिना भिटोलिनामाथि ६–३ र ६–२ को सहज जित निकालिन् । यस्तै १३ औं बरियाताकी साफारोभाले स्पेनी गार्बिन मुगुरुजालाई ७–६ र ६–३ ले पाखा लगाईन् ।
