जेठ १८, एजेन्सी ।
जापानका केई निसिकोरी, स्विजरल्याण्डका स्टेनिसलस वावरिन्का र फ्रान्सका जो वेल्फ्रेड सोङ्गा, फ्रेन्च ओपन टेनिसको क्वाटरफाईनलमा प्रवेश गरेका छन् ।
गएराती भएको खेलमा रसियाका तेईमुराज गाभासभिलीलाई ६–३, ६–४ र ६–२ को साझो सेटमा पराजित गर्दै पाँचौं बरियाताका निसिकोरी अन्तिम ८ मा प्रवेश गरेका हुन् । यस्तै फ्रान्सका गिलेज सिमोनलाई ६–१, ६–४ र ६–२ ले पराजित गर्दै आठौं बरियाताका वावरिन्का पनि क्वाटरफाईनलमा स्थान बनाउन सफल भए । यस्तै चौधौं बरियाताका सोङ्गाले अन्तिम ८ मा स्थान बनाउने क्रममा चौथो बरियाताका चेकरिपब्लिकन थोमस बर्डिचलाई ६–३, ६–२, ६–७ र ६–३ ले पाखा लगाए ।
महिला एकल तर्फ सातौं बरियाताकी अन्ना ईभानोभिचले नवौं बरियाता प्राप्त एकातेरिना माकारोभालाई ७–५, ३–६ र ६–१ ले पराजित गर्दै क्वाटरफाईनलमा स्थान बनाईन् । अर्को खेलमा युक्रेनकी एलिना भिटोलिनाले फ्रान्सकी एलिज कोर्नेटलाई ६–२ र ७–६ ले पराजित गरिन् ।
