जेठ १३, एजेन्सी ।
शीर्ष बरियाताका नोभाक जोकोभिच र सेरेना विलिएम्सले फ्रेन्च ओपन टेनिसमा विजयी सुरुवात गरेका छन् । छैठौ बरियाताका राफेल नाडाल पनि दोस्रो चरणमा प्रवेश गरेका छन् ।
गएराती भएको खेलमा फिनल्याण्डका जार्को नेईमिननलाई ६–२, ७–५ र ६–२ ले पराजित गर्दै सर्बियन जोकोभिचले प्रतियोगितामा विजयी सुरुवात गरेका हुन् । अर्को खेलमा स्पेनका नाडालले फ्रान्सका क्विन्टन हेलिजलाई ६–३, ६–३ र ६–४ ले पाखा लगाउँदै दोस्रो चरणमा स्थान बनाए । पुरुष एकल तर्फका अन्य खेलमा स्पेनका डेभिड फेरर, फ्रान्सका रिचार्ड गास्क्वेट, क्रोएसियाका मारिन किलिक, अमेरिकाका जोन ईसर र साउथ अफ्रिकाका केभिन एण्डरसन पनि आ–आफ्नै खेल जित्दै दोस्रो चरणमा प्रवेश गरेका छन् ।
महिला एकल तर्फ अमेरिकन सेरेना विलिएम्सले चेक रिपब्लिककी एन्ड्रिया लाभाकोभालाई ६– २ र ६–३ ले पराजित गरिन् । चौथो बरियाताकी चेक रिपब्लिकन पेट्रा भिटोभाले न्युजिल्याण्डकी मारिना एराकोभिकमाथि ६–४, ३–६ र ६–४ को संघर्षपूर्ण जित निकाल्दै दोस्रो स्थानमा प्रवेश गरिन् । महिला एकल तर्फकै अन्य खेलमा डेनमार्ककी क्यारोलिन वाज्नेस्कि, जर्मनी एन्ड्रिया पेट्कोभिक, रसियन स्वेत्लाना कुज्नेत्सोभा, अमेरिकाकी मादिसन केईज पनि आ–आफ्नो खेल जित्दै अघिल्लो चरणमा स्थान बनाउन सफल भएका छन् ।
