जेठ १२, एजेन्सी ।
न्युजिल्याण्ड बिरुद्धको पहिलो टेष्ट क्रिकेटमा ईङ्ल्याण्ड विजयी भएको छ । पाँचौ तथा अन्तिम दिन १ सय २४ रनको नाटकीय जित निकाल्दै घरेलु टोलीले २ म्याचको सिरिजमा १–० को अग्रता लिएको छ ।
७९ ओभरको खेल बाँकी रहेको अवस्थामा ३ सय ४५ रनको लक्ष्य पछ्याएको न्युजिल्याण्ड २ सय २० रनमा समेटिएपछि ईङ्ल्याण्ड अप्रत्यासित जित निकाल्न सफल भयो । कोरी एण्डरसनले ६७ र बीजी वाट्लीङ्गले ५९ रन बनाउनु बाहेक अन्यको प्रदर्शन उल्लेख्य हुन सकेन । कप्तान ब्रेण्डोन म्याककुलुम, मार्टिन गुप्टिल र टोम लाथम डक आउट भए । स्टुवार्ड ब्रोड र बेन स्टोकले समान ३ विकेट लिए ।
यसअघि ६ विकेटको क्षतिमा ४ सय २९ रनबाट अन्तिम दिनको खेल थालेको ईङ्ल्याण्ड थप ११ ओभर खल्दै ४ सय ७८ रनमा अलआउट भएको थियो । लण्डनमा टस हारेर ब्याटिङ्ग गरेको ईङ्ल्याण्डले पहिलो ईनिङ्गस्मा ३ सय ८९ रन बनाएको थियो भने न्युजिल्याण्डलले ५ सय २३ रन जोडेको थियो ।
