क्रान्ति साह, वीरगञ्ज ।
पर्सा प्रहरीले जलाउँदै गरेको अवस्थामा हिजो साँझ एक बालिकाको शव बरामद गरेको छ । पर्साको सेढवा गाविस वडा नम्बर ६ घर भई हाल पर्साकै सुवर्णपुर गाविस वडा नम्बर ७ बाघमोर्चा टोल बस्ने सुरेश महतो कंकडकी १३ बर्षिया छोरी शोभावती कुमारीको शव जलाउदै गरेको अवस्थामा प्रहरीले बरामद गरेको हो ।
बाघमोर्चा खोला नजिकै दशगजा क्षेत्रमा जलाउँदै गरेको अवस्थामा शव बरामद गरिएको प्रहरी नायव उपरिक्षक वीरबहादुर ओलीले बताउनुभयो । प्रहरीका अनुसार सोभावतीको मृत्यु रहस्यमय भएको सूचनाका आधारमा शव बरामद गरिएको हो । बालिकाको घाँटीमा निल डाम समेत देखिएको छ । प्रहरी घटनास्थलमा पुग्दा मलामी गएका सबैजना फरार भएपछि घटना झनै शंकास्पद भएको छ ।
पर्सा प्रहरीका प्रवक्ता प्रहरी नायव उपरिक्षक ओलीले आत्महत्या नै भएपनि पक्रिया पुरा गरेर दाहसंस्कार गर्नुपर्नेमा गाँउलेले हतार गरेकोले जलाउँदै गर्दा शव बरामद गर्नुपरेको बताउनुभयो । घटनाबारे थप अनुसन्धान भैरहेको पर्सा प्रहरीले जनाएको छ ।
