जेठ ११, एजेन्सी ।
ईङ्लीस प्रेमियरसिप फुटवलबाट रेलिगेशनमा परेपनि हल सिटीले गएराती १० खेलाडिमा सीमित म्यानचेष्टर युनाईटेडलाई बराबरीमा रोकेको छ । यो सिजनको अन्तिम खेलमा उसले म्यान युनाईटेडलाई गोल रहित बराबरीमा रोकेका हो । यद्यपी ३५ अंकमा १८ औं स्थानमा रहँदै हल सिटी प्रेमियरलिगमा उक्लिएको दुई बर्ष पछि नै रेलिगेशनमा परेको छ । बर्नली र QPR यसअघि नै रेलिगेशनमा परिसकेका छन् । अर्को खेलमा न्युकासलले वेष्टहामलाई २–० ले पराजित गरेपछि रेलिगेशन हुनबाट बचेको थियो । म्यान युनाईटेडले भने ७० अंकमा चौथो स्थानमा रहँदै यो सिजनको लिग सकेको छ । ७७ औं मिनेटमा मारिनो फेलानी रातो कार्ड खादै मैदान बाहिरिएपछि युनाईटेड १० खेलाडिमा सीमित भएको थियो ।
यस्तै पछिल्लो समय खराव फर्मबाट गुज्रिरहेको लिभरपुल स्टक सिटीसँग ६–१ गोल अन्तरमा पराजित भयो । हारपछि लिभरपुल ६२ अंकमा तालिकाको छैठौं स्थानमा चिप्लिएको छ । एभरटनलाई १–० ले पराजित गरेको टटनहामले ६४ अंकमा पाँचौ स्थानमा रहँदै लिग सकेको छ ।
सिजनको अन्तिम खेलमा उपाधि विजेता चेल्सीले सण्डरल्याण्डलाई ३–१ ले पराजित ग¥यो । लुईस रेमीले खेलको अन्त्यतिर दुई मिनेट भित्र दुई गोल गरेपछि चेल्सीले १–० ले पछि परेको स्थिति उल्ट्याउदै ३–१ को जित निकालेको हो । खेलको २६ औं मिनेटमा स्टेफन फ्लेचरले गोल गर्दै सण्डरल्याण्डलाई अग्रता दिलाएका थिए । तर डिएगो कोष्टाले ३७ औं मिनेटमा पेनाल्टी मार्फत गोल गरेपछि खेल बराबरीमा आएको थियो ।
गएराती नै भएका अन्य खेलमा दोस्रो स्थानको म्यानचेष्टर सिटीले साउथ हेप्टनलाई २–० ले र तेस्रो स्थानको आर्सनलले वेष्ट ब्रोमलाई ४–१ ले पराजित गरे । यस्तै बर्नलीले एष्टनभिल्लालाई तथा क्रिष्टल प्यालेसले स्वान्सीलाई समान १–० ले पराजित गर्दा QPR लिसेष्टरसँग ५–१ ले स्तब्ध बन्यो ।
