जेठ ७, एजेन्सी ।
राजस्थान रोयल्सलाई ७१ रनले पाखा लगाउदै रोयल च्यालेन्जर्स बैङलोर आईपिएल क्रिकेटको फाईनल नजिक पुगेको छ ।
गएराती भएको खेलमा राजस्थान रोयल्स माथि फराकिलो जित दर्ता गर्दै बैङलोर बिजयि भएको हो । टस जितेर पहिले ब्याटिङ गरेको बैङलोरले निर्धारित ओभरमा ४ विकेट गुमाउदै १ सय ८० रनको योगफल तयार पारेको थियो । ओपनर क्रिस गेल र कप्तान बिराट कोहलीलाई सस्तैमा गुमाएको बैङलोरका लागि मन्दिप सिंह र एबि डिभिलियर्सले ११३ रनको साझेदारि गर्दै टोलिलाई उच्च योगफलसम्म पुर्याएका थिए ।
खेलमा मन्दिपले नटआउट ५४ तथा डिभिलियर्सले ६६ रन बनाए । १ सय ८१ रनको चुनौती पच्छ्याएको राजस्थान रोयल्स १ सय ९ रनमा समेटिएको थियो । राजस्थानका लागि अजन्क्या रहानेले ४२ रन बनाउनु बाहेक अन्य ब्याट्सम्यानले उल्लेख्य प्रर्दशन गर्न सकेनन् । हारपछि राजस्थान प्रतियोगिताबाट बाहिरिएको छ भने बैङलोरले फाईनल प्रबेशका लागि भोलि चेन्नई सुपर किङगसको सामना गर्नेछ ।
