जेठ ३, एजेन्सी ।
ईङ्लीस प्रेमियरसिप फुटवलमा आज दुई वटा खेलहरु हुदैछन् । दोस्रो स्थानको म्यानचेष्टर सिटीले स्वान्सीसँग प्रतिस्पर्धा गर्दैछ । ७३ अंकमा तालिकाको दोस्रो स्थानमा रहेको सिटी आजको खेलमा विजयी भए तेस्रो स्थानको आर्सनलसँग ६ अंकको दुरी कायम गर्नेछ । स्वान्सी भने ५६ अंकमा आठौं स्थानमा छ ।
यस्तै आजै हुने अर्को खेलमा आर्सनल र म्यानचेष्टर युनाईटेडबीच प्रतिस्वर्धा हुनेछ । जारी लिगमा आफ्नो ३ खेल बाँकी हुँदा आर्सनल ७० अंकमा तालिकाको तेस्रो स्थानमा छ भने एक खेल बढी खेलेको म्यान युनाईटेड ६८ अंकमा चौथो स्थानमा रहेको छ ।
यसअघि गएराती भएको खेलमा पाँचौ स्थानमा रहेको लिभरपुल क्रिष्टल प्यालेससँग ३–१ ले पराजित भएको छ । गएरातीको पराजयपछि ६२ अंक भएको लिभपुलको उत्कृष्ट पाँचमा पर्ने सम्भावना समेत कठिन भएको छ । लिभरपुलमा १७ बर्ष बिताएका कप्तान स्टेफन जेरार्डले होम ग्राउण्ड एन्फील्डमा भएको आफ्नो अन्तिम खेलमा भने पराजय ब्यहोरे । आगामी सिजनबाट अमेरिकन क्लब जाने भएका जेरार्डको बिदाईमा उपस्थिति हजारौं घरेलु दर्शकले भावपूर्ण बिदाई गर्दा लिभरपुलका लागि ७ सय ९ खेलमा सहभागी जोरार्डले सुखद नतिजा भने दिन सकेनन् । लिभरपुलले जारी सिजनको आफ्नो अन्तिम खेलमा आगामी आईतवार स्टक सिटीसँग प्रतिस्पर्धा गर्नेछ ।
अन्य खेलमा साउथ हेप्टनले एष्टन भिल्लालाई ६–१ ले, QPR ले न्युकासललाई २–१ ले, टटनहामले हल सिटीलाई २–० ले र एभरटनले वेष्टहामलाई २–१ ले पराजित गरे । बर्नली र स्टक सिटी तथा सण्डरल्याण्ड र लिसेष्टरले भने गोल रहित बराबरी खेल्दै अंक बाढेका छन् ।
