बैशाख २९, एजेन्सी ।
इण्डियन प्रिमियर लिग क्रिकेट आईपीएलमा किंग्स इलावेन पञ्जावले हारको श्रृंखला यसपटक पनि जोगाउन सकेन । राजीव गान्धी अन्तराष्ट्रिय क्रिकेट मैदानमा गएराती भएको खेलमा हैदरावादसँग पन्जाब ५ रनले पराजित भयो । घरेलु मैदानमा टस जितेर पहिले व्याटिङ गरेको हैदराबादले प्रस्तुत गरेको १ सय ८६ रनको विजयी लक्ष्य पछ्याएको पन्जाबले निर्धारित ओभरमा ७ विकेटको क्षतिमा १ सय ८० रन मात्र बनाउन सक्यो । डेभिड मिलरले अविजित ८९ रनको योगदान दिए पनि जितका लागि पर्याप्त हुन सकेन । रोमाञ्चक रहेको खेलमा मोइज हेनरिक्सले तीन विकेट लिए भने विपुल शर्माको नाममा २ विकेट रह्यो ।
यसअघि पहिले ब्याटिङ गरेको हैदराबादले २० ओभरमा ५ विकेट गुमाउँदै १ सय ८५ रन जोडेको थियो । उसका लागि डेभिड वानर्रले ५२ बलको सामना गर्दै ५ छक्का र ६ चौका प्रहार गर्दै ८१ रन जोेडे । जितपछि हैदरावाद १४ अंकमा तालिकाको तेस्रो स्थानमा उक्लिएको छ । गत बर्षको उपविजेता पञ्जाव भने ४ अंकमा पुछारमा कायमै छ ।
लिगमा आज देल्ली डेर डेभिल्स र चेन्नेइ सुपर किंग्सबीच खेल हुनेछ ।
