दुई मोटरसाइकल ठोक्किदा चारजनाको मृत्यु

राजविराज, २७ वैशाख :  सप्तरीको शम्भुनाथमा दुई मोटरसाइकल शनिबार एकापसमा ठोक्किदा चारजनाको मृत्यु भएको छ । शम्भुनाथ ७ स्थित पूर्व–पश्चिम लोकमार्गमा पश्चिमबाट पूर्वतर्फ जाँदै गरेको बा.६६ प १०९१ नम्बरको मोटरसाइकल र विपरित दिशाबाट जाँदै गरेको को.१८प ८२५७ नम्बरको मोटरसाइकल एकापसमा ठोक्किदा दुवै मोटरसाइकलमा सवार चारैजनाको घटनास्थलमै मृत्यु भएको हो ।
दुर्घटनामा काठमाडौं टंगालका ३५ वर्षीय नरेशकुमार मानन्धर, बाराको गडमल ५ का २१ वर्षीय बैजुप्रसाद फौजदार, सुनसरीको इटहरी नपा १ का १८ वर्षीय सरत मगर र दोल्खा भिमेश्वर नपा १० का २२ वर्षीय निमा तामाङको मृत्यु भएको प्रहरीले जनाएको छ । तिब्र गतिका कारण मोटरसाइकल एकापसमा ठोक्किएको प्रहरीले जनाएको छ । उनीहरुको शवलाई राउ स्मारक अस्पताल लहानमा राखिएको छ । दुर्घटनाग्रस्त मोटरसाइकलहरु इलाका प्रहरी कार्यालय कल्याणपुरको नियन्त्रणमा राखिएको छ ।