बैशाख २७, एजेन्सी ।
बार्सिलोना स्पेनिस ला लिगा फुटबलमा रियल सोसिडाडलाई २–० ले पराजित गर्दै उपाधि नजिक पुगेको छ । गएराति भएको खेलमा दोस्रो स्थानमा रहेको रियल मड्रिड भ्यालेन्सियासँग २– २ को बराबरीमा रोकिँदा बार्सिलोना उपाधि नजिक पुगेको हो । जारी लिगमा दुई खेल मात्र बाँकी रहँदा बार्सा एक जित टाढा छ ।
बार्सिलोना ३६ खेलबाट ९० अंकका साथ शीर्ष स्थानमा रँहदा समान खेल खेलेको रियल ८६ अंकमा दोस्रो स्थानमा छ । पहिलो हाफ गोलरहित बराबरीमा सकिए पनि ५१ औँ मिनेटमा नेयमारको गोलबाट अग्रता लिएको बार्साका लागि ८५ मिनेटमा पेड्रोले थप गोल गर्दै जित पक्का गरे ।
उता क्रिष्टियानो रोनाल्डो पेनाल्टीमा गोल गर्न चुकेपछि रियल मड्रिड भ्यालेन्सीयासँग २–२ गोलको बराबरीमा रोकियोे । पहिलो हाफमा दुई शुन्यले पछि परेको स्थिति उल्टाउँदै रियलका लागि पेपे र इस्कोले गोल गर्दै हार टारेका थिए । भ्यालेन्सियाले भने १९ औं मिनेटमा गार्सियाको गोलबाट अग्रता लिएको थियो । २६ औं मिनेटमा मार्टिनेजले थप गोल गरेपछि भ्यालेन्सिया पहिलोहाफमा नै २–० अग्रता लिन सफल भएको थियो । तर दोस्रो हाफमा रियलले उत्कृष्ट खेल पस्किएपछि भ्यालेन्सियाले अग्रता जोगाउन भने सकेन ।
पहिलो हाफको अन्तिम मिनेटमा ग्यारेथ बेललाई फल गरेपछि पाएको पेनाल्टीलाई रोनाल्डोले गोलमा परिणत गर्न नसक्दा रियल दवावमा परेको थियो ।
