बैशाख २५, एजेन्सी ।
इण्डियन प्रिमियर लिग क्रिकेट आइपिएलमा सनराइजर्स हैदरावादले राजस्थान रोयल्सलाई सात रनले पराजित गरेको छ । टस हारेर व्याटिङ रोजेको हैदरावादले निर्धारित पुरै ओभरको खेलमा ४ विकेट गुमाउँदै दुई सय एक रन जोड्यो । उसका लागि ओएन मोर्गान र शिखर धवनले अर्धशतकको पारी खेले । त्यस्तै डेभिड वार्नर २४ र मोइज हेनरिक्स २० रन स्कोर गर्दै पवेलियन फर्किँदा रवी बोपारा १७ र नमन ओझा ८ रनमा नटआउट रहे । २ सय २ रनको लक्ष्य लिएर जवाफी मैदानमा आएको राजस्थानले पूरै २० ओभरमा ७ विकेट गुमाएर १ सय ९४ रनको मात्र जोड्न सक्यो । उसका लागि स्टिेभन स्मिथले ६८ रन बनाए पनि अन्य ब्याट्सम्यान चल्न नसक्दा हार ब्यहोरेको हो ।
त्यस्तै गए राती नै भएको अर्काे खेलमा कोलकोता नाइटराइडर्सले देल्ली डेर डेभिलसलाई १३ रनले हराएको छ । टस जितेर व्याटिङको निम्तो पाएको कोलकोताले निर्धारित ओभरमा सात विकेटको क्षतिमा एक सय एकहत्तर रन जोड्यो । उसको लागि युसुफ पठानले ४२ तथा रविन उथप्पाले ३२ रन जोड्नुबाहेक अन्यको प्रदर्शन बलियो देखिएन । एक सय बहत्तर रनको चुनौती लिएर जवाफी व्याटिङमा आएको देल्ली पूरै ओभरमा ६ विकेट गुमाएर १ सय ५८ मै समेटिँदा हार वेहोर्न वाध्य भयो ।
यसैबीच लिगमा आज तालिकाको शीर्ष स्थानमा रहेको चेन्नेई सुपर किंग्स र छैठौँ स्थानको मुम्बइ इण्डियन्सबीच प्रतिस्पर्धा हुदैछ । खेल चेन्नेइ स्वामी स्टेडियममा राती सवा आठ बजे हुने छ ।
