बैशाख २२, एजेन्सी ।
ईङ्ल्याण्डका ब्याट्सम्यान जोनाथन ट्रटले अन्तराष्ट्रिय क्रिकेटबाट सन्यास लिएका छन् ।
वेष्टईण्डिजबिरुद्धको ३ म्याचको सिरिज बराबरीमा सकिए लगत्तै ३४ बर्षे ट्रटले सन्यासको घोषणा गरेका हुन् । क्यारेबियन टोली बिरुद्धको ६ ईनिङ्गस्मा आफ्नो ब्याट चलाएका उनले ७२ रनमात्र जोडेका थिए । सन्यासको घोषणा गर्दै उनले आफ्नो पछिल्लो प्रदर्शन ईङ्ल्याण्डको खेल स्तर अनुसारको नभएको बताएका छन् । सन् २००९ मा भएको एसेस सिरिजमा सतक प्रहार गर्दै ट्रटले अन्तराष्ट्रिय क्रिकेटमा शानदार डेब्यु गरेका थिए । दायाँ हाते ब्याट्सम्यान ट्रटले ५२ टेष्ट म्याचबाट ३ हजार ८ सय ३५ रन जोडेका छन् ।
सन् २००९ मा आयरल्याण्ड बिरुद्धको खेलबाट वन डे क्रिकेटमा आएका जोनाथन २०१३ सेप्टेम्बरमा भएको अष्ट्रेलिया बिरुद्धको खेलपछि टोलीमा अटाएका थिएनन् ।
