बैशाख २१, एजेन्सी ।
ईङ्ल्याण्डबिरुद्धको तेस्रो टेष्ट क्रिकेटमा वेष्टईण्डिज ५ विकेटले विजयी भएको छ । योसँगै ३ म्याचको सिरिज १–१ को बराबरीमा सकिएको छ ।
बारबाडोसमा १ सय ९२ रनको लक्ष्य घरेलु टोली वेष्टईण्डिजले ५ विकेटको क्षतिमा भेट्टायो ।
डारेन ब्राभोले ८२ र जेरोमी ब्लाकउडले नटआउट ४७ रन जोडेपछि क्यारेबियन टोली तेस्रो दिननै म्याच आफ्नो पक्षमा पार्न सफल भयो । जेरोमी टेलर, जासन होल्डर र भिरस्वामी पारमोलले समान ३ विकेट लिएपछि ५ विकेटको क्षतिमा ३९ रनबाट तेस्रो दिनको खेल थालेको ईङ्ल्याण्ड दोस्रो ईनिङ्गस्मा मात्र १ सय २३ रनमा समेटिएको थियो ।
टस जितेर पहिले ब्याटिङ्ग गरेको ईङ्ल्याण्डले पहिलो इनिङ्गस्मा २ सय ५७ रन जोडेको थियो भने वेष्टईण्डिज १ सय ८९ रनमा समेटिएको थियो । सिरिजको पहिलो म्याच बराबरीमा सकिएपनि दोस्रो म्याच भने ईङ्ल्याण्डले ९ विकेटले जितेको थियो ।
