काठमाडौं, १२ बैशाख ।
काठमाडौंमा जारी एएफसी अण्डर १४ गल्स क्षेत्रीय च्याम्पियनसीप फुटबलको उपाधिका लागि आज नेपाल र बंगलादेशबीच प्रतिस्पर्धा हुदैछ । खेल अपरान्ह ४ बजेपछि त्रिपुरेश्वरस्थित दशरथ रंगशालामा हुनेछ । नेपाल समुह ए को र बंगलादेश समुह बीको विजेता बन्दै सेमिफाईनल पुगेका थिए ।
दशरथ रंगशालामा हिजो भएको सेमिफाईनलमा भारतलाई १–० ले पराजित गदै नेपाल उपाधि नजिक पुगेको हो । उपाधि रक्षा नजिक पुगेको डिफेण्डिङ्ग च्याम्पियन नेपालका लागि एकमात्र गोल ४४ औं मिनेटमा निर्मला उपाध्यायले गरिन् ।
हिजै भएको दोस्रो सेमिफाइनलमा इरानलाई २–० ले हराउँदै बंगलादेश फाइनलमा पुगेको हो । बंगलादेशका लागि कृष्ण रानी र माजिर्जले गोल गरे ।
तेस्रो स्थानका लागि आजै अपरान्ह १ बजे भारत र इरानबीच प्रतिस्पर्धा हुनेछ ।
