बैशाख १२, एजेन्सी ।
राजस्थान रोएल्सले जारी ईण्डियन प्रमियर लिग क्रिकेटमा लगातार दोस्रो हार ब्यहारेको छ । अघिल्ला ५ खेलमा अपराजित रहँदै प्रभावशाली खेल प्रदर्शन गरेको राजस्थान गएराती रोएल च्यालेन्जर्स बैंङ्लोरसँग ९ विकेटको फराकिलो अन्तरमा पराजित भयो । हारपछि पनि राजस्थान १० अंकमा शीर्ष स्थानमा कायमै छ भने ५ खेलबाट ४ अंक जोडेको बैंङ्लोर छैठौ स्थानमा उक्लिएको छ ।
राजस्थानले दिएको १ सय ३१ रनका सामान्य लक्ष्य बैंङ्लोरले २३ वलबाँकी हुँदा १ विकेट गुमाएर भेट्टायो । उसको जितमा नटआउट रहँदै कप्तान बिराट कोहलीले ६२ र एबिडि भिलियर्सले ४७ रनको पारी खेले । क्रिस गेल भने २० रनमा आउट भए ।
यसअघि गुहमैदान अहमदावादमा टस हारेर ब्याटिङ्ग गरेको राजस्थानले निर्धारित ओभरमा ९ विकेट गुमाई १ सय ३० रनमात्र जोड्न सक्यो । जारी लिगमा राजस्थानले बनाएको यो सवैभन्दा कम स्कोर हो । राजस्थानका लागि स्टेभन स्मिथले सर्वाधिक ३१ र शेन वाट्सनले २६ रन जोडे । ६ जना ब्याट्सम्यान दोहोरो अंकको स्कोर नगर्दै पवेलियन फर्के । उसलाई सस्तैमा समेट्न मिचेल स्टार्सले ३ विकेट लिए ।
प्रतियोगितामा आज मुम्बई ईण्डियन्स र सनराईजर्स हैदरावाद तथा चेन्नई सुपर किङ्गस् र किङ्स ईलेभेन पञ्जावबीच प्रतिस्पर्धा हुनेछ ।
