बैशाख ९, एजेन्सी ।
बार्सिलोना र बायर्न म्युनिख, च्याम्पियन्स लिग फुटवलको सेमिफाईन प्रवेश गरेका छन् ।
दोस्रो लेगमा गएराती फ्रान्सको पेरिस सेन्ट जर्मेनलाई २–० ले पराजित गरेको स्पेनी क्लब बार्सा÷ समग्रमा ५–१ ले विजयी हुदै अन्तिम ४ मा प्रवेश गरेको हो । च्याम्पियन्स लिगको सेमिफाईनलमा लगातार तेस्रो पटक बार्साको स्थान सुरक्षित गर्ने क्रममा ब्रजिलियन स्टार नेईमरले पहिलो हाफमा दुवै गोल गरे । खेलको १४ औं मिनेटमा गोल गर्दै बार्सालाई अग्रता दिलाएका उनले ३४ औं मिनेटमा हेडरमार्फत उत्कृष्ट गोल गरेपछि बार्सा उपाधि यात्रामा अगाडि बढ्न सफल भयो ।
गएराती नै भएको अर्को खेलमा जर्मन क्लब बायर्न म्युनिखले पोर्चुगलको एफसी पोर्तोमाथि ६–१ को एकतर्फी जित निकाल्यो । पहिलो लेगमा ३–१ ले पछि परेको अवस्था उल्ट्याउदै म्युनिखले पोर्तो बिरुद्ध दोस्रो लेगमा एकतर्फी खेल पस्किएको थियो । प्रतियोगिताको सेमिफाईनलमा स्थान बनाएको म्युनिखले यो लगातार चौथो पटक हो । खेलको पहिलो हाफमा ५–० को अग्रता लिएको म्युनिखले दोस्रो हाफमा भने एक गोलमात्र थपेको थियो । पोर्तोको एकमात्र गोल भने ७३ औं मिनेटमा मात्र सम्भव भएको थियो ।
