बैशाख ९, एजेन्सी ।
सुपर ओभरमा पराजित गर्दै किङ्स ईलेभेन पञ्जावले ईण्डियन प्रेमियरलिग क्रिकेट आईपिएलमा राजस्थान रोएल्सको ५ खेल लामो अपराजित यात्रामा पूर्ण बिराम लगाएको छ । जितसँगै पञ्जाव ४ अंकमा तालिकाको पाँचौ स्थानमा उक्लिएको छ भने हारपछि पनि राजस्थान भने १० अंकमा शीर्ष स्थानमा कायमै छ । सुपर ओभरमा पञ्जावले दिएको १६ रनको लक्ष्य पछ्याएको राजस्थानले लगातार दुई विकेट गुमाएपछि हार ब्यहोर्न बाध्य भयो ।
१ सय ९२ रनको लक्ष्य पछ्याएको पञ्जावले निर्धारित ओभरमा ६ विकेट गुमाई १ सय ९१ रन जोडेपछि निर्णय सुपर ओभरबाट भएको हो । सुपर ओभरमा समेत नायक बनेका शन मार्सले ४० वलमा ६५ र डेभिड मिलरले ३० वलमा ५४ रन जोडेका थिए । नवौं ओभरमा ३ विकेट गुमाउदै ५९ रन जोडेको स्थिति सम्हाल्दै मार्स र मिलरले पञ्चावलाई खेलमा फर्काएका थिए ।
यसअघि अहमदावादमा टस हारेर ब्याटिङ्ग गरेको राजस्थानले निर्धारित ओभरमा ६ विकेट गुमाई १ सय ९१ रन जोडेको थियो । अजन्क्या राहानेले ७४ र सेन वाट्सनले ४५ रन जोडेपछि राजस्थान उच्च योगफल बनाउन सफल भएको थियो ।
प्रतियोगितामा आज कोलकात्ता नाईट राईडर्स र सनराईजर्स हैदरावाद तथा चेन्नई सुपर किङ्स र रोएल च्यालेन्जर्स बैंङ्लोरबीच प्रतिस्पर्धा हुनेछ ।
