एजेन्सी, ३ बैशाख ।
बार्सिलोना पेरिस सेन्ट जर्मनीलाई ३–१ को अग्रता हासिल गर्दै च्याम्पियन्स लिग फुटबलको सेमिफाइनल प्रवेश गर्ने सम्भावना बलियो बनाएको छ । पिएसजीको घरेलु मैदानमा गए राति भएको खेलमा बार्सिलोनाले समग्रमा पेरिस सेन्ट जर्मेन पीएसजीविरुद्ध दुई गोलको अग्रता लिएको छ । बार्सिलोना आठ सिजनमा सातौं पटक सेमिफाइनल नजिक पुग्दा फ्रान्सेली क्लब पीएसजीको घरेलु मैदानमा अपराजित यात्रामा पूर्णविराम लागेको छ ।
खेल सुरु भएको १४ औं मिनेटमा नेयमारले गोल गर्दै बार्सिलोनालाई सुरुवाति अग्रता दिलाए । दोस्रो हाफको ६७ र ७९ औं मिनेटमा लुइस स्वरेजले गोल गरेपछि बासिर्लोनाले ३–० को अग्रता लिएको थियो । खेलको ८२ औं मिनेटमा बार्सिलोनाका म्याथुले आत्माघाती गोल गरेका हुन ।
गएराति नै भएको अर्काे खेलमा वार्यन म्युनिख पोर्टो फुटबल क्लबसँग ३–१ गोलले पराजित भएको छ । पहिलो हारपछि म्युनिखलाई सेमिफाइनलमा पुग्ने दोस्रो लेगमा ठूलो अन्तरको जित हात पार्नु पर्ने हुन्छ ।
घरेलु मैदानमा भएको खेलमा पोर्टोले सुरुवाति १० मिनेटमा नै दुई गोलको अग्रता लिइसकेको थियो । त्यस्तै, ६५ औं मिनेटमा ज्याक्सन माटिर्टेजले अर्काे गोल थप्दा पोर्टोले ३–१ को महत्वपूर्ण जित हात पारेको हो ।
