बैशाख १, काठमाडौं ।
रेडियो अन्नपूर्ण नेपाल ९४ ले आजबाट आफ्नो नियमित प्रशारण सुरु गरेको छ । Nepal News Network International Pvt. Ltd. अर्थात थ्री एन आई मातहत रहेको यो रेडियो ९४ मेघाहर्जमा चौबिसै घण्टा सुन्न सकिनेछ । सूचना तथा मनोरञ्चनात्मक कार्यक्रमका साथै यस रेडियोले बिभिन्न समयमा गरी १५ वटा बुलेटिन प्रशारण गर्नेछ । यो रेडियोसँग सञ्चार क्षेत्रका चर्चित ब्यक्तित्वहरु सुशील शर्मा, शेखर खरेल, रीता लिम्बु, दीपक समिर लगायत आवद्ध हुनु हुन्छ ।
रेडियोको शुभारम्भ गर्दै अन्नपूर्ण मिडिया नेटवर्कका अध्यक्ष रामेश्वर थापाले सञ्चार जगतका मूल्य मान्यतालाई संस्थागत गर्दै नयाँ रेडियोको शुभारम्भ भएको घोषणा गर्नुभयोे । महाराजगञ्जस्थित रेडियो प्राङगणमा आयोजित एक कार्यक्रमका बीच उहाँले पानसमा बत्ती बालेर रेडियो सफलताको कामना समेत गर्नुभयो ।
अन्नपूर्ण पोष्टका प्रधान सम्पादक युवराज घिमिरेले थ्रीएनआई अन्तरगत आजबाट प्रसारणमा आएको रेडियो अन्नपूर्ण नेपालको सफलताको कामना गर्दै सूचना र मनोरञ्चन प्रदानका लागि मेहनतको खाँचो औल्याउनुभयो ।
रेडियो अन्नपूर्ण नेपाल ९४ तपाईले www.radioannapurnanepal.com मा समेत सुन्न र पढ्न सक्नु हुन्छ ।
